Abu Dhabi Canvas’ Project അബുദാബി: നഗരത്തെ കൂടുതൽ മനോഹരമാക്കാനും പ്രാദേശിക കലകളെ പ്രോത്സാഹിപ്പിക്കാനും ലക്ഷ്യമിട്ട് അബുദാബി മുനിസിപ്പാലിറ്റിയും ട്രാൻസ്പോർട്ട് വകുപ്പും (DMT) ‘അബുദാബി ക്യാൻവാസ്’ എന്ന പുതിയ പദ്ധതി ആരംഭിച്ചു. നഗരത്തിലെ ബസ് സ്റ്റോപ്പുകൾ, സീബ്രാ ക്രോസിംഗുകൾ, ഇലക്ട്രിക് ബോക്സുകൾ എന്നിവയിൽ കലാചിത്രങ്ങൾ ഒരുക്കുന്നതാണ് പദ്ധതി.
യുഎഇ സ്വദേശികളും വിദേശികളും ഉൾപ്പെടെയുള്ള കലാകാരന്മാരുടെ സൃഷ്ടികളാണ് പൊതുവിടങ്ങളിൽ പ്രദർശിപ്പിക്കുന്നത്. കിംഗ് അബ്ദുള്ള ബിൻ അബ്ദുൽ അസീസ് അൽ സൗദ് സ്ട്രീറ്റ്, മദീനത്ത് സായിദ് ഷോപ്പിംഗ് സെന്റർ, കോർണിഷ് സ്ട്രീറ്റ് എന്നിവിടങ്ങളിലെ ബസ് സ്റ്റോപ്പുകൾ ഇതിനകം തന്നെ മ്യൂറലുകളാൽ അലങ്കരിച്ചിട്ടുണ്ട്.
റാബ്ദാൻ മേഖലയിലെ വികസനത്തിന്റെ ഭാഗമായി അഞ്ച് എമിറാത്തി കലാകാരന്മാരെയാണ് തെരഞ്ഞെടുത്തത്. അറബിക് കോഫി പോട്ട്, കുതിര, ഫാൽക്കൺ, മുത്തുവാരി എടുക്കൽ, പരമ്പരാഗത ധൗ കപ്പലുകൾ തുടങ്ങിയ യുഎഇയുടെ പൈതൃകം പ്രതിഫലിപ്പിക്കുന്ന ചിത്രങ്ങളാണ് ഇവിടെ ഒരുക്കുന്നത്.
നഗരത്തിലെ ഡെലിവറി തൊഴിലാളികൾക്കായി ഒരുക്കിയിരിക്കുന്ന ഡെലിവറി റൈഡേഴ്സ് ഹബുകളും കലാചിത്രങ്ങളാൽ അലങ്കരിക്കും. മുബാദല ഫൗണ്ടേഷനും അബുദാബി വിദ്യാഭ്യാസ-ജ്ഞാന വകുപ്പും (ADEK) ചേർന്നാണ് പദ്ധതി നടപ്പാക്കുന്നത്.
നഗരത്തിന് സൗന്ദര്യം നൽകുന്നതിനൊപ്പം കലയെ പൊതുജനങ്ങളിലേക്കെത്തിക്കാനും പദ്ധതി സഹായിക്കുമെന്ന് അധികൃതർ അറിയിച്ചു. സഞ്ചാരികൾക്കും നാട്ടുകാർക്കും പുതിയ അനുഭവം നൽകുന്നതാണ് ഈ കലാസൃഷ്ടികൾ.
