Qatar Kingfish Fishing Ban Ends : ദോഹ: ഖത്തറിൽ കിംഗ്ഫിഷ് മത്സ്യബന്ധനത്തിന് ഏർപ്പെടുത്തിയിരുന്ന സീസണൽ നിരോധനം ഒക്ടോബർ 31ന് അവസാനിക്കും. മത്സ്യസമ്പത്ത് സംരക്ഷിക്കുന്നതിനും കിംഗ്ഫിഷിന്റെ പ്രജനനം ഉറപ്പാക്കുന്നതിനും സമുദ്രവിഭവങ്ങളുടെ സുസ്ഥിരത പ്രോത്സാഹിപ്പിക്കുന്നതിനുമായാണ് മുനിസിപ്പാലിറ്റി മന്ത്രാലയം നിയന്ത്രണങ്ങൾ ഏർപ്പെടുത്തിയത്.
നിരോധന കാലയളവിൽ മത്സ്യബന്ധനം നിശ്ചിത ലൈനുകൾ ഉപയോഗിച്ച് നടത്താൻ മാത്രമാണ് അനുമതി നൽകിയിരുന്നത്. കിംഗ്ഫിഷിനെ പിടിക്കാൻ ഉപയോഗിക്കുന്ന ഗിൽനെറ്റുകൾക്ക് വിലക്കേർപ്പെടുത്തിയിരുന്നു. പ്രജനനത്തിന് കൂടുതൽ അവസരം നൽകുകയും മത്സ്യങ്ങളുടെ സ്വാഭാവിക ശേഖരം സംരക്ഷിക്കുകയും ചെയ്യുകയാണ് ഇതിന്റെ ലക്ഷ്യം.
നിയമം ലംഘിച്ചാൽ 10,000 റിയാൽ വരെ പിഴ
നിരോധന കാലയളവിൽ മത്സ്യബന്ധന യാനങ്ങളിൽ കിംഗ്ഫിഷ് വലകൾ കൊണ്ടുപോകുന്നതിനും കൈകാര്യം ചെയ്യുന്നതിനും നിയന്ത്രണമുണ്ട്. ഫിഷറീസ് വകുപ്പ് ലൈസൻസ് നൽകിയ യാനങ്ങൾക്ക് ലൈനുകൾ ഉപയോഗിച്ച് മാത്രമേ മത്സ്യബന്ധനം നടത്താൻ അനുവാദമുള്ളൂ.
ശാസ്ത്രീയ ഗവേഷണത്തിനായി അധികാരപ്പെടുത്തിയവർക്ക് മന്ത്രാലയത്തിന്റെ പ്രത്യേക പെർമിറ്റോടെ ഇളവ് ലഭിക്കും.
നിയമം ലംഘിക്കുന്നവർക്ക് 2,000 മുതൽ 10,000 ഖത്തർ റിയാൽ വരെ പിഴ ചുമത്താം. നിയമലംഘനത്തിന് ഉപയോഗിച്ച മത്സ്യബന്ധന ഉപകരണങ്ങൾ കണ്ടുകെട്ടാനും വ്യവസ്ഥയുണ്ട്.
2025ൽ ഉൽപ്പാദനം 3,484 ടൺ
ഖത്തറിൽ 2025ൽ കിംഗ്ഫിഷ് ഉൽപ്പാദനം ഏകദേശം 3,484 ടണ്ണിലെത്തി. രാജ്യത്തിന്റെ മത്സ്യബന്ധന മേഖലയിലും ഭക്ഷ്യസുരക്ഷയിലും ഈ മത്സ്യത്തിനുള്ള പ്രാധാന്യമാണ് കണക്ക് വ്യക്തമാക്കുന്നത്.
ഗൾഫ് സഹകരണ കൗൺസിൽ രാജ്യങ്ങളുടെ കാർഷിക സഹകരണ സമിതിയുടെ തീരുമാനങ്ങളുടെ ഭാഗമായാണ് കിംഗ്ഫിഷ് സംരക്ഷണ നടപടികൾ നടപ്പാക്കുന്നത്. മത്സ്യബന്ധന സീസൺ നിയന്ത്രിക്കുക, പിടിക്കാവുന്ന മത്സ്യങ്ങളുടെ കുറഞ്ഞ നിയമപരമായ നീളം വർധിപ്പിക്കുക, വലകളുടെ കണ്ണികളുടെ വലുപ്പം കൂട്ടുക തുടങ്ങിയ നടപടികളും ഇതിൽ ഉൾപ്പെടുന്നു.
2008 മുതൽ സംരക്ഷണ പദ്ധതി
മത്സ്യങ്ങളുടെ പ്രജനനകാലത്ത് അമിതമായ മത്സ്യബന്ധനം നിയന്ത്രിക്കുന്നതിനായി 2008 മുതൽ ഖത്തറിൽ ഫിഷറീസ് മാനേജ്മെന്റ് പദ്ധതി നടപ്പാക്കിവരുന്നു. കിംഗ്ഫിഷ് ഉൾപ്പെടെ സാമ്പത്തിക പ്രാധാന്യമുള്ള നിരവധി മത്സ്യയിനങ്ങളുടെ സംരക്ഷണമാണ് പദ്ധതിയുടെ ലക്ഷ്യം.
ഓഗസ്റ്റ് മധ്യത്തിൽ ആരംഭിക്കുന്ന സീസണൽ നിരോധനത്തിനു പുറമേ മാർച്ച്, ഏപ്രിൽ, മേയ് മാസങ്ങളിലും മത്സ്യബന്ധന നിയന്ത്രണങ്ങൾ ഏർപ്പെടുത്തുന്നുണ്ട്. മത്സ്യസമ്പത്തിന്റെ കുറവ് തടയുകയും ദീർഘകാലത്തേക്ക് അവയുടെ ലഭ്യത ഉറപ്പാക്കുകയുമാണ് ലക്ഷ്യം.
മത്സ്യത്തൊഴിലാളികൾക്ക് സാമ്പത്തിക സഹായം
നിരോധന കാലയളവിൽ വരുമാനനഷ്ടം നേരിടുന്ന മത്സ്യത്തൊഴിലാളികൾക്ക് ഖത്തർ മുനിസിപ്പാലിറ്റി മന്ത്രാലയം സാമ്പത്തിക സഹായവും നൽകുന്നുണ്ട്.
കഴിഞ്ഞ വർഷം രണ്ട് മാസത്തെ നിരോധന കാലയളവിലേക്ക് ഏകദേശം 16.8 ലക്ഷം റിയാൽ നഷ്ടപരിഹാരമായി അനുവദിച്ചു. 168 ലൈസൻസുള്ള മത്സ്യബന്ധന യാനങ്ങൾക്കാണ് ഇതിന്റെ പ്രയോജനം ലഭിച്ചത്.
ഇതിനു പുറമേ, 356 സ്വകാര്യ കപ്പലുകൾക്കും 15 മത്സ്യബന്ധന കപ്പലുകൾക്കും ഉൾപ്പെടെ ലൈസൻസുള്ള തടി മത്സ്യബന്ധന യാനങ്ങൾക്ക് വാർഷിക സഹായമായി ഏകദേശം 37.85 ലക്ഷം റിയാൽ മന്ത്രാലയം അനുവദിക്കുന്നുണ്ട്.
മത്സ്യസമ്പത്ത് സംരക്ഷിക്കുന്നതിനൊപ്പം മത്സ്യത്തൊഴിലാളികളുടെ ഉപജീവനമാർഗം നിലനിർത്താനും ഖത്തറിലെ സമുദ്ര മത്സ്യബന്ധന മേഖലയുടെ സുസ്ഥിരത ഉറപ്പാക്കാനുമാണ് ഈ നടപടികൾ ലക്ഷ്യമിടുന്നത്.
