Improper Lane Changes a Leading Cause of Accidents കുവൈത്ത് സിറ്റി: റോഡുകളിൽ ശരിയായ രീതിയിലല്ലാതെ ലെയ്ൻ മാറുന്നത് വാഹനാപകടങ്ങളുടെ പ്രധാന കാരണങ്ങളിലൊന്നാണെന്ന് കുവൈത്ത് ട്രാഫിക് വകുപ്പ് മുന്നറിയിപ്പ് നൽകി. സുരക്ഷിതമായ ഡ്രൈവിങ് രീതികൾ പാലിക്കണമെന്നും ലെയ്ൻ മാറ്റുമ്പോൾ കൂടുതൽ ജാഗ്രത പുലർത്തണമെന്നും അധികൃതർ വാഹനയാത്രക്കാരോട് ആവശ്യപ്പെട്ടു.
ലെയ്ൻ മാറ്റുന്നതിന് മുമ്പ് റോഡിൽ മറ്റു വാഹനങ്ങളില്ലെന്ന് ഉറപ്പാക്കുകയും ഇൻഡിക്കേറ്റർ നേരത്തേ ഉപയോഗിക്കുകയും വേണം. പെട്ടെന്ന് ലെയ്ൻ മാറുന്നതിനു പകരം ആവശ്യമായ ശ്രദ്ധയോടെ ക്രമേണ മറ്റൊരു ലെയ്‌നിലേക്ക് മാറുന്നതാണ് സുരക്ഷിതമെന്നും അധികൃതർ വ്യക്തമാക്കി.
വാഹനത്തിന്റെ വേഗത നിയന്ത്രിക്കുന്നതിനൊപ്പം മറ്റു വാഹനങ്ങളുമായി മതിയായ സുരക്ഷിത അകലം പാലിക്കണമെന്നും ട്രാഫിക് വകുപ്പ് നിർദേശിച്ചു. ലെയ്ൻ മാറ്റുമ്പോൾ പിന്നിൽനിന്നും സമീപത്തുനിന്നും വരുന്ന വാഹനങ്ങളുടെ സഞ്ചാരം ശ്രദ്ധിക്കേണ്ടതും അത്യാവശ്യമാണ്.
ട്രാഫിക് നിയമങ്ങൾ കൃത്യമായി പാലിക്കുന്നത് അപകടങ്ങൾ കുറയ്ക്കാനും റോഡുപയോഗിക്കുന്നവരുടെ ജീവൻ സംരക്ഷിക്കാനും സഹായിക്കുമെന്ന് അധികൃതർ ചൂണ്ടിക്കാട്ടി. ഡ്രൈവർമാർ സ്വന്തം സുരക്ഷയ്ക്കൊപ്പം യാത്രക്കാരുടെയും മറ്റു വാഹനയാത്രക്കാരുടെയും സുരക്ഷയ്ക്കും പ്രാധാന്യം നൽകണമെന്നും വകുപ്പ് അഭ്യർഥിച്ചു.
