Gulf CBSE Class 12 Special Exam Dates:ദുബൈ: ഈ വർഷം ആദ്യം ബോർഡ് പരീക്ഷ എഴുതാൻ കഴിയാതെ പോയ യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ പന്ത്രണ്ടാം ക്ലാസ് വിദ്യാർത്ഥികൾക്കായി സി.ബി.എസ്.ഇ. പ്രത്യേക പരീക്ഷകൾ പ്രഖ്യാപിച്ചു. ഒക്ടോബർ 23 മുതൽ 28 വരെയാണ് പരീക്ഷകൾ നടക്കുകയെന്ന് സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ അറിയിച്ചു. പരീക്ഷാ കൺട്രോളർ ഡോ. സന്യാം ഭരദ്വാജ് പുറപ്പെടുവിച്ച സർക്കുലറിലാണ് ടൈംടേബിൾ ഔദ്യോഗികമായി പ്രഖ്യാപിച്ചത്. അപേക്ഷകർക്ക് തങ്ങളുടെ ലോഗിൻ വിവരങ്ങൾ ഉപയോഗിച്ച് അഡ്മിറ്റ് കാർഡുകൾ ഡൗൺലോഡ് ചെയ്യാം.
മേഖലയിലെ സംഘർഷഭരിതമായ സാഹചര്യങ്ങളെത്തുടർന്ന് യുഎഇ, സഊദി അറേബ്യ, കുവൈത്ത്, ഖത്തർ, ഒമാൻ, ബഹ്‌റൈൻ, ഇറാൻ എന്നീ രാജ്യങ്ങളിലെ 40 വിഷയങ്ങളിലെ 12-ാം ക്ലാസ് പരീക്ഷകൾ കഴിഞ്ഞ മാർച്ചിൽ റദ്ദാക്കിയിരുന്നു. തുടർന്ന് ബോർഡ് അവതരിപ്പിച്ച പ്രത്യേക മൂല്യനിർണ്ണയ പദ്ധതി പ്രകാരം ലഭിച്ച മാർക്കിൽ തൃപ്തരല്ലാത്ത വിദ്യാർത്ഥികൾക്കാണ് ഇപ്പോൾ വീണ്ടും പരീക്ഷ എഴുതാൻ അവസരമൊരുക്കിയിരിക്കുന്നത്.
പരീക്ഷകൾക്കായി ഓരോ രാജ്യത്തും പ്രത്യേക കേന്ദ്രങ്ങൾ സജ്ജീകരിച്ചിട്ടുണ്ട്. പ്രത്യേക പരീക്ഷയിൽ ലഭിക്കുന്ന മാർക്കായിരിക്കും വിദ്യാർത്ഥികളുടെ അന്തിമ സ്കോറായി പരിഗണിക്കുക.
പരീക്ഷാ ടൈംടേബിൾ
ഒക്ടോബർ 23 (വെള്ളി): പൊളിറ്റിക്കൽ സയൻസ്, ഇക്കണോമിക്‌സ്, മാത്തമാറ്റിക്‌സ്, അപ്ലൈഡ് മാത്തമാറ്റിക്‌സ്.
ഒക്ടോബർ 24 (ശനി): സൈക്കോളജി, ബിസിനസ് സ്റ്റഡീസ്, ഫിസിക്കൽ ആക്ടിവിറ്റി ട്രെയിനർ (രാവിലെ 10:30 – ഉച്ചയ്ക്ക് 12:30).
ഒക്ടോബർ 26 (തിങ്കൾ): ബയോളജി, ഇൻഫർമേഷൻ ടെക്നോളജി, മാർക്കറ്റിംഗ്, മൾട്ടിമീഡിയ, ആർട്ടിഫിഷ്യൽ ഇന്റലിജൻസ്.
ഒക്ടോബർ 27 (ചൊവ്വ): ഹോം സയൻസ്, ഇൻഫോർമാറ്റിക്സ് പ്രാക്ടീസസ്, കമ്പ്യൂട്ടർ സയൻസ്.
ഒക്ടോബർ 28 (ബുധൻ): ഇംഗ്ലീഷ് കോർ.
ചില പേപ്പറുകൾ രാവിലെ 10:30 മുതൽ 12:30 വരെയും മറ്റ് പേപ്പറുകൾ രാവിലെ 10:30 മുതൽ ഉച്ചയ്ക്ക് 1:30 വരെയുമാണ് നടക്കുക. പൂർണ്ണമായ ഷെഡ്യൂളിനും അപ്‌ഡേറ്റുകൾക്കുമായി വിദ്യാർത്ഥികൾക്ക് cbse.gov.in എന്ന ഔദ്യോഗിക വെബ്‌സൈറ്റ് സന്ദർശിക്കാവുന്നതാണ്.
