ദുബായ്: യുഎഇയിലെ ചെറുകിട, സൂക്ഷ്മ സംരംഭകർക്ക് സാമ്പത്തിക സഹായം ലഭ്യമാക്കുന്നതിനായി ഡിജിറ്റൽ വായ്പാ സേവനം ആരംഭിച്ച് പ്രമുഖ ഡിജിറ്റൽ പ്ലാറ്റ്‌ഫോമായ ബോട്ടിം (Botim). പുതിയ പദ്ധതിയിലൂടെ അർഹരായ സ്ഥാപനങ്ങൾക്ക് 10,000 ദിർഹം മുതൽ പരമാവധി 5 ലക്ഷം ദിർഹം വരെ വായ്പ ലഭിക്കും. വായ്പ തിരിച്ചടയ്ക്കാൻ 12 മാസം വരെ സമയവും അനുവദിക്കും.

പ്രവർത്തന മൂലധനത്തിന്റെ ആവശ്യങ്ങൾ നിറവേറ്റാനും ജീവനക്കാരുടെ ശമ്പളം നൽകാനും ഉപകരണങ്ങൾ വാങ്ങാനും ബിസിനസ് വിപുലീകരിക്കാനുമെല്ലാം വായ്പാ തുക ഉപയോഗിക്കാം. ചെറുകിട സംരംഭകർക്ക് സാമ്പത്തിക സഹായം കൂടുതൽ വേഗത്തിലും എളുപ്പത്തിലും ലഭ്യമാക്കുകയാണ് പുതിയ സേവനത്തിന്റെ ലക്ഷ്യം.

30,000-ത്തിലധികം വ്യാപാരികൾക്ക് പ്രയോജനം

ഫിൻടെക്, പേയ്‌മെന്റ് സേവനദാതാക്കളായ ഗീഡിയയുമായി (Geidea) സഹകരിച്ചാണ് ബോട്ടിം ഈ വായ്പാ സേവനം അവതരിപ്പിച്ചിരിക്കുന്നത്. ആദ്യഘട്ടത്തിൽ ഗീഡിയയുടെ യുഎഇയിലെ വ്യാപാര ശൃംഖലയിലുള്ള 30,000-ത്തിലധികം വ്യാപാരികൾക്ക് പദ്ധതിയുടെ പ്രയോജനം ലഭിക്കുമെന്നാണ് പ്രതീക്ഷ.

ലിമിറ്റഡ് ലയബിലിറ്റി കമ്പനികൾക്കും (LLC) സോൾ പ്രൊപ്രൈറ്റർഷിപ്പ് സ്ഥാപനങ്ങൾക്കും നിശ്ചിത യോഗ്യതാ മാനദണ്ഡങ്ങൾ പാലിച്ചാൽ വായ്പയ്ക്കായി അപേക്ഷിക്കാം. എന്നാൽ വായ്പ ലഭിക്കുന്നത് സ്ഥാപനത്തിന്റെ യോഗ്യതാ പരിശോധനയ്ക്കും ക്രെഡിറ്റ് വിലയിരുത്തലിനും മറ്റ് ബാധകമായ നിബന്ധനകൾക്കും വിധേയമായിരിക്കും.

വായ്പാനുമതിക്ക് എഐ സാങ്കേതികവിദ്യ

നിർമിതബുദ്ധി (AI) സാങ്കേതികവിദ്യ ഉപയോഗിച്ചാണ് സ്ഥാപനങ്ങളുടെ സാമ്പത്തിക സ്ഥിതി വിലയിരുത്തുന്നത്. ബിസിനസിന്റെ സാമ്പത്തിക ഇടപാടുകൾ, പണമൊഴുക്ക് (Cash Flow), ക്രെഡിറ്റ് തിരിച്ചടവ് ചരിത്രം തുടങ്ങിയ വിവരങ്ങൾ പരിശോധിച്ചായിരിക്കും വായ്പാ യോഗ്യതയും അനുവദിക്കാവുന്ന തുകയും നിർണയിക്കുക.

പരമ്പരാഗത ബാങ്ക് വായ്പകളിലെ ദൈർഘ്യമേറിയ നടപടിക്രമങ്ങൾ ഒഴിവാക്കി വേഗത്തിൽ യോഗ്യത പരിശോധിക്കാൻ ഈ സംവിധാനം സഹായിക്കുമെന്നാണ് കമ്പനിയുടെ പ്രതീക്ഷ. സ്ഥാപനത്തിന്റെ പ്രവർത്തനരീതിക്കും സാമ്പത്തിക ആവശ്യങ്ങൾക്കും അനുസരിച്ചുള്ള ധനസഹായം ലഭ്യമാക്കാനും ഇതിലൂടെ സാധിക്കും.

യുഎഇയിലെ ചെറുകിട ബിസിനസുകൾക്ക് കരുത്താകും

യുഎഇയിലെ മൊത്തം ബിസിനസ് സ്ഥാപനങ്ങളിൽ ഏകദേശം 94 ശതമാനവും ചെറുകിട, ഇടത്തരം സംരംഭങ്ങളാണ്. രാജ്യത്തിന്റെ സാമ്പത്തിക വളർച്ചയിൽ നിർണായക പങ്കുവഹിക്കുന്ന ഈ മേഖലയിലെ പല സ്ഥാപനങ്ങൾക്കും കർശനമായ യോഗ്യതാ മാനദണ്ഡങ്ങളും നീണ്ട അപേക്ഷാ നടപടികളും കാരണം സമയബന്ധിതമായി വായ്പ ലഭിക്കുന്നത് വെല്ലുവിളിയാകാറുണ്ട്.

ഈ സാഹചര്യം പരിഗണിച്ചാണ് ഡിജിറ്റൽ വായ്പാ സേവനം അവതരിപ്പിച്ചിരിക്കുന്നത്. 2030-ഓടെ യുഎഇയിലെ ചെറുകിട, ഇടത്തരം സംരംഭങ്ങളുടെ എണ്ണം പത്ത് ലക്ഷമായി ഉയർത്തുകയെന്ന രാജ്യത്തിന്റെ ലക്ഷ്യത്തിനും പുതിയ പദ്ധതി പിന്തുണയാകുമെന്നാണ് വിലയിരുത്തൽ.

ബോട്ടിം ബിസിനസ് പ്ലാറ്റ്‌ഫോമിന്റെ ഭാഗമായാണ് പുതിയ വായ്പാ സേവനം പ്രവർത്തിക്കുക. പേയ്‌മെന്റ് ഗേറ്റ്‌വേ, പോയിന്റ് ഓഫ് സെയിൽ (POS), ശമ്പള വിതരണം, വേജ് പ്രൊട്ടക്ഷൻ സിസ്റ്റം (WPS) തുടങ്ങിയ സേവനങ്ങൾക്കൊപ്പം ബിസിനസുകൾക്ക് സാമ്പത്തിക സഹായവും ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

ശ്രദ്ധിക്കുക: വായ്പയ്ക്ക് അപേക്ഷിക്കുന്നതിന് മുമ്പ് യോഗ്യതാ മാനദണ്ഡങ്ങൾ, പലിശ അല്ലെങ്കിൽ മറ്റ് ധനകാര്യ ചെലവുകൾ, തിരിച്ചടവ് വ്യവസ്ഥകൾ എന്നിവ ഔദ്യോഗികമായി പരിശോധിക്കണം.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക