Dubai Speed Limit Changes;ദുബായ് സ്പീഡ് ലിമിറ്റ് മാറ്റം: യുഎഇയിലെ ദുബായിൽ അഞ്ച് പ്രധാന റോഡുകളിലെ പരമാവധി വേഗപരിധിയിൽ നവംബർ 1 മുതൽ മാറ്റം വരും. മൂന്ന് റോഡുകളിൽ വേഗപരിധി ഉയർത്തുമ്പോൾ മറ്റ് രണ്ട് റോഡുകളിൽ കുറയ്ക്കാനാണ് തീരുമാനം. റോഡ് സുരക്ഷയും ഗതാഗതത്തിന്റെ സുഗമമായ ഒഴുക്കും മെച്ചപ്പെടുത്തുന്നതിന്റെ ഭാഗമായാണ് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റിയും (RTA) ദുബായ് പൊലീസും ചേർന്ന് പുതിയ പരിഷ്കാരം പ്രഖ്യാപിച്ചത്.
മൂന്ന് റോഡുകളിൽ വേഗപരിധി ഉയരും
1. അൽ അസായൽ സ്ട്രീറ്റ് (Al Asayel Street)
ഊദ് മേത്ത സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിലുള്ള ഭാഗത്ത് വേഗപരിധി മണിക്കൂറിൽ 60 കിലോമീറ്ററിൽനിന്ന് 80 കിലോമീറ്ററായി ഉയരും.
2. അൽ മുസ്തഖ്ബൽ സ്ട്രീറ്റ് (Al Mustaqbal Street)
ഷെയ്ഖ് റാഷിദ് സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിലുള്ള ഭാഗത്ത് വേഗപരിധി 60 കിലോമീറ്ററിൽനിന്ന് 70 കിലോമീറ്ററായി ഉയർത്തും.
3. ലത്തീഫ ബിൻത് ഹംദാൻ സ്ട്രീറ്റ് (Latifa bint Hamdan Street)
ഷെയ്ഖ് സായിദ് റോഡിനും അൽ ഖൈൽ റോഡിനും ഇടയിലുള്ള ഭാഗത്ത് വേഗപരിധി 60 കിലോമീറ്ററിൽനിന്ന് 70 കിലോമീറ്ററായി വർധിപ്പിക്കും.
രണ്ട് റോഡുകളിൽ വേഗപരിധി കുറയും
4. അൽ റിബാത്ത് സ്ട്രീറ്റ് (Al Rebat Street)
മറാക്കേഷ് സ്ട്രീറ്റിനും ഷെയ്ഖ് മുഹമ്മദ് ബിൻ സായിദ് റോഡിനും ഇടയിലുള്ള ഭാഗത്ത് വേഗപരിധി മണിക്കൂറിൽ 100 കിലോമീറ്ററിൽനിന്ന് 90 കിലോമീറ്ററായി കുറയ്ക്കും.
5. ഷെയ്ഖ് സബാഹ് അൽ അഹ്മദ് അൽ ജാബർ അൽ സബാഹ് സ്ട്രീറ്റ്
2nd December സ്ട്രീറ്റിനും ഖാലിദ് ബിൻ അൽ വലീദ് സ്ട്രീറ്റിനും ഇടയിലുള്ള ഭാഗത്ത് വേഗപരിധി 80 കിലോമീറ്ററിൽനിന്ന് 70 കിലോമീറ്ററായി കുറയ്ക്കും. ഈ മാറ്റങ്ങൾ രണ്ട് ദിശകളിലേക്കും ബാധകമായിരിക്കും.
സ്പീഡ് ക്യാമറകളിലും മാറ്റം
പുതിയ വേഗപരിധികൾ പ്രാബല്യത്തിൽ വരുന്നതിന് മുന്നോടിയായി ബന്ധപ്പെട്ട റോഡുകളിൽ പുതിയ വേഗപരിധി ബോർഡുകൾ സ്ഥാപിക്കും. പുതുക്കിയ പരിധികൾക്കനുസരിച്ച് സ്പീഡ് ക്യാമറകളും പുനഃക്രമീകരിക്കും.
2026-ലെ ദുബായ് സ്പീഡ് മാനേജ്‌മെന്റ് മാനുവലിലെ പുതുക്കിയ സാങ്കേതിക മാനദണ്ഡങ്ങളുടെ അടിസ്ഥാനത്തിൽ, വിശദമായ എൻജിനീയറിങ്-സാങ്കേതിക പഠനങ്ങൾ നടത്തിയ ശേഷമാണ് ഈ തീരുമാനമെടുത്തത്. റോഡുകളുടെ ഘടനയ്ക്കും നിലവിലെ ഗതാഗത സാഹചര്യങ്ങൾക്കും അനുയോജ്യമായ വേഗപരിധി ഉറപ്പാക്കുക, അപകടസാധ്യത കുറയ്ക്കുക, ഗതാഗതം കൂടുതൽ സുഗമമാക്കുക എന്നിവയാണ് ലക്ഷ്യങ്ങൾ.
ശ്രദ്ധിക്കുക: നവംബർ 1 മുതൽ യാത്ര ചെയ്യുമ്പോൾ ബന്ധപ്പെട്ട റോഡുകളിലെ പുതിയ വേഗപരിധി ബോർഡുകൾ ശ്രദ്ധിക്കുക. പഴയ വേഗപരിധി കണക്കാക്കി വാഹനമോടിക്കുന്നത് ഒഴിവാക്കുക.
