Kuwait Report Me service : കുവൈത്ത് സിറ്റി: തൊഴിൽ നിയമങ്ങളുടെയും ചട്ടങ്ങളുടെയും ലംഘനങ്ങൾ പൊതുജനങ്ങൾക്ക് ഓൺലൈനായി റിപ്പോർട്ട് ചെയ്യാൻ പുതിയ ഇലക്ട്രോണിക് സേവനം ആരംഭിച്ച് കുവൈത്ത് പബ്ലിക് അതോറിറ്റി ഫോർ മാൻപവർ. ‘Report Me’ എന്ന പേരിലുള്ള സേവനത്തിലൂടെ അതോറിറ്റിയുടെ മേൽനോട്ടത്തിലുള്ള തൊഴിൽ മേഖലയിലെ നിയമലംഘനങ്ങൾ അറിയിക്കാം.
തൊഴിലാളികളുടെ അവകാശങ്ങൾ സംരക്ഷിക്കുക, തൊഴിൽ വിപണിയിലെ നിയമപാലനം ശക്തമാക്കുക, മനുഷ്യക്കടത്തും തൊഴിൽ മേഖലയിലെ മറ്റ് നിയമലംഘനങ്ങളും തടയാനുള്ള ശ്രമങ്ങൾക്ക് പിന്തുണ നൽകുക എന്നിവയാണ് പുതിയ സേവനത്തിന്റെ ലക്ഷ്യം.
പൊതുജനങ്ങൾക്ക് നിയമലംഘനങ്ങൾ റിപ്പോർട്ട് ചെയ്യാനും ബന്ധപ്പെട്ട നിയമങ്ങളും തീരുമാനങ്ങളും പാലിക്കുന്നുണ്ടെന്ന് ഉറപ്പാക്കാനുള്ള പ്രവർത്തനങ്ങളിൽ പങ്കാളികളാകാനും ഈ ഓൺലൈൻ സംവിധാനത്തിലൂടെ സാധിക്കും. തൊഴിൽ വിപണിയിലെ നിരീക്ഷണവും നിയന്ത്രണവും കൂടുതൽ ശക്തമാക്കാനും സേവനം സഹായിക്കുമെന്ന് അതോറിറ്റി വ്യക്തമാക്കി.
ഗാർഹിക തൊഴിലാളികളെ റിക്രൂട്ട് ചെയ്യുന്ന ഓഫീസുകൾക്കും കമ്പനികൾക്കുമെതിരായ പരാതികളും ഈ സേവനത്തിലൂടെ അറിയിക്കാം. നിശ്ചയിച്ച പരിധിയേക്കാൾ കൂടുതൽ റിക്രൂട്ട്‌മെന്റ് ഫീസ് ഈടാക്കുക, പണം സ്വീകരിച്ചിട്ടും രസീത് നൽകാതിരിക്കുക തുടങ്ങിയ നിയമലംഘനങ്ങൾ ശ്രദ്ധയിൽപ്പെട്ടാൽ പൊതുജനങ്ങൾക്ക് റിപ്പോർട്ട് സമർപ്പിക്കാം.
തൊഴിൽ മേഖലയിലെ നിയമലംഘനങ്ങൾ കണ്ടെത്തുന്നതിനും തൊഴിലാളികളുടെ അവകാശങ്ങൾ സംരക്ഷിക്കുന്നതിനും പുതിയ സംവിധാനം സഹായകരമാകുമെന്നാണ് പ്രതീക്ഷ.
